Print this page

Atividade Bazár iha Merkadu Maubisse Balu "Kontra" Regra EE

By January 10, 2021 1850

Tempotimor (Maubisse)- Komunidade iha Postu Administrativu Maubisse, Munisípiu Ainaro ne'ebé hala'o atividade bazár iha merkadu la preokupa regra estadu emerjénsia da-siak tanba halibur malu liu ema na'in-10.

Tuir observasaun jornalista tempotimor iha terrenu nota, komunidade sira ne'ebé hala'o atividade iha merkadu Maubisse la kumpri regra distansiamentu sosiál, la uza maskára, no kontinua halibur malu liu ema na'in-10 iha fatin publiku.

Pesoál Polísia Nasionál Timor-Leste ida hateten, komunidade iha postu administrativu refere ulun toos, ko'alia la rona.

"Ema sira iha-ne'e paling toos, iha kinta ne'e pika, pika mais la rona ohin mai nafatin", membru PNTL ne'ebé lakohi públika ninia identidade, ko'alia iha merkadu Maubisse, domingu (10/01).

Iha fatin hanesan Arlindo Maia Soares nu'udár negosiante ne'ebé fa'an sasán iha merkadu Maubisse hatete, la kumpri regra EE ne'e só ema balun ne'ebé seidauk asesu ba informasaun.

"La kumpri regra tanba balu seidauk rona informasaun, ne'ebé foin daudaun kinta fó hatene ona mas fó hatene tarde uitoan, ne'ebé balun seidauk rona, ne'e mak sira balun mai la ta'uk, bainbain iha-ne'e rame liu mak domingu ho kinta de'it, kada vez sira esplika tarde mak balun laiha maskára", Nia informa

Nia dehan, komunidade sira tuir hela desizaun ne'ebé governu hasai kona-ba kumpri regra, maibé só informasaun husi parte autoridade PNTL ho postu saúde tarde ne'e mak balun seidauk asesu, ne'ebé balun la hatene regra.

"Buat ida estadu ne'e, ema sempre tuir, tanba buat ida mate ne'e se mak hakarak mate", nia dehan

Maske nune'e, maibé parte PNTL postu Maubisse kontinua kontrola no aviza ba komunidade sira- ne'ebé hala'o atividade iha merkadu Maubisse hodi mantein nafatin uza maskára no kumpri distansiamentu sosial.

Jornalista tempotimor tenta ona atu komfirma asuntu ne'e ba Komadante PNTL postu Maubisse, maibe laiha fatin. (*)

Rate this item
(0 votes)
Last modified on Sunday, 10 January 2021 17:32
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items