Xefe suku Fahisoi, Filomena Soares hateten, estrada iha suku Fahisoi nafatin aat to'o agora.
"Estrada mak afeta teb-tebes ba movimentu atu lori komunidade nia sasan ka produtu mai kapitál munisípiu nian. Tanba iha baze ne'e importante mak estrada, mais agora udan ne'e susar tebes ona," Xefe suku Fahisoi hateten iha CCD, Segunda (21/12).
Xefe suku ne'e dehan, kona-ba liña eletrisidade ba suku Fahisoi tama ona, maibé kontinua mate lakan.
"Listrik mate-lakan hela de'it, tanba klima ne'ebé iha hanesan, udan, anin-boot ne'ebé ai tohan hodi baku kotu no hanehan fiu sira, entaun ita tenke kompriende," nia dehan.
Kona-ba fasilidade saúde iha suku Fahisoi, komunidade sira asesu ho di'ak no komunidade Fahisoi rasik iha produtu hanesan fehuk, talas, sabraka, bani-been no seluk tan.
Suku Fahisoi ho totál uma-ka'in 435 no totál populasaun 1.387 ne'ebé kompostu husi mane no feto.(*)