Pesoal Polisia Na’in 3 Baku Lisuk Mane Ida tan de’it husu Karta Despaixu PM

Komandante PNTL Aileu, Jorge Monteiro Komandante PNTL Aileu, Jorge Monteiro Foto screen TVTL

Tempotimor (Aileu)-Pesoal Polisia Nasionál Timor Leste (PNTL) na’in tolu (3) ho inisial JL, MM no EdS baku komunidade ida iha Aileu tan de’it komunidade ne’e husu karta despaisu husi Primeiru Ministru Taur Matan Ruak ba pesoal PNTL na’in tolu ne’e.

Tuir informasaun, iha Kuarta (6/11), vitima João Xavier (78) ne’ebé hela iha aldeia Sarin, Suku Bandudato, Munisipiu Aileu, ne’ebé afetadu ba estabelesimentu sidade universitariu husu ba pesoal PNTL na’in tolu ne’ebé akompaña prosesu levantamentu dadus, kona-ba karta despaisu husi PM Taur.

Pesoal polisia na’in tolu ne’e la hatan didi’ak, maibé halo fali agresaun fiziku hasoru komunidade ne’e.

"Ha’u-nia oan feto foin husu de'it karta despaisu husi Primeiru Ministru, polisia lansung basa ha’u dala rua no dada ha’u-nia liman rua ba kotuk hodi soe tuun ba rai, depois ha’u dehan “ne'e krime, nusa buat saida mak la di’ak ne'e mai par ita kolia didi’ak dei't”," informa João Xavier ba jornalista sira hafoin partisipa dialogu ho PM Taur iha salaun administrasaun munisipiu Aileu, Kuarta (14/11/19).

Ba kestaun ne'e, komadante PNTL munisipiu Aileu, Jorge Monteiro husu ba vitima atu lori kazu ne’e ba Ministériu Públiku (MP) bainhira iha evidensia ne’ebé forte.

"Ha’u konsidera komunidade kestiona membru PNTL baku komunidade ne'e falsu, tanba iha levantamentu dadus ne'e laiha konflitu entre liña ministerial, komunidade no polisia, oinsa mak polisia baku fali komunidade?," dehan Jorge.

Bainhira akontese agresaun fiziku, nia husu ba komunidade sira atu hato’o keixa ba Komando Jeral PNTL hodi loke prosesu.

"Kuandu akontese ona agresaun fiziku ruma favor ida hato'o ba Komando Jeral PNTL hodi loke prosesu disiplinar, akontese krime bele ba hato'o keixa ba Ministériu Públiku par loke prosesu kriminal," deklara nia.

Maske nune’e, nia garante katak laiha agresaun fiziku iha terenu tanba ekipa ne’ebé halo atuasaun iha terenu la informa katak mosu kazu agresaun hasoru komunidade.

Rate this item
(4 votes)
Last modified on Friday, 15 November 2019 07:44
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com