Tempo Timor - Kanal Notisia, Husi imi ba imi

Switch to desktop Register Login

Tempo Timor

Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

Website URL: http://www.tempotimor.com

Xanana Rejeita Propaganda FRETILIN

Published in Politika

Kay Rala Xanana Gusmão fakar hela bee ba Mari Alkatiri nia ulun bainhira hala'o kampaña prezidensial iha tinan 2017 iha Gleno, Ermera. Foto Valentino Dariel Sousa. 

VIKEKE – Eis primeiru – ministru, Kay Rala Xanana Gusmão rejeita total deklarasaun sekretariu jeral partidu FRETILIN atual primeiru – ministru governu jestaun no governu minoritariu, Mari Alkatiri katak bainhira FRETILIN manan Xanana mak sei ba negosia kadoras mina no gas mai Timor – Leste. 

Xanana hatutan, antes ne’e sekretariu jeral partidu FRETILIN, Mari Alkatiri liuhosi nia kampaña politika katak, bainhira FRETILIN manan sei kontinua fó fiar ba Kay Rala Xanana Gusmão hodi lidera prosesu negosiasaun ba dada kadoras mina rai mai Timor – Leste, maibé Alkatiri mós durante halo kampaña politika iha teritoriu nasional sempre deklara katak governasaun AMP durante tinan 10 atu dada de’it kadoras (bee moos) tama ba kada uma kain mós difisil ona, sa tan atu ba dada kadoras mina rai.

Xanana konsidera propaganda Alkatiri nian ne’e kontinua habosok nia kamarada sira iha partidu FRETILIN no povu tomak iha rai laran. Nune’e, nia husu atu labele tolan tomak de’it ba saida mak Alkatiri deklara durante ne’e.

“Terlambat sudah. Tergantung situasi. O nia pikiran ne’e tenke jelas, tenke loos. Labele bili mak balan fali. Sira han na’an bibi karik mak ko’alia hanesan ne’e,” hatete Xanana liuhosi nia diskursu kampaña politika AMP nian ne’ebé hala’o iha munisipiu Vikeke, Sabádu (05/05).

“Propaganda ne’e hanesan iha tinan kotuk katak bainhira FRETILIN manan Xanana mós manan, maibé propaganda ne’e nu’udar propaganda bosok ten no kari rai rahun ba povu nia matan,” esplika Xanana.

“Kadoras mina rai tenke dada mai Timor hodi dudu ekonómia iha Vikeke no dudu ekonómia iha Timor laran tomak,” promete Xanana.

Situasaun kampaña AMP nian iha munisipiu Vikeke la’o ho hakmatek to’o remata, maibé bainhira militante sira fila ba sira nia uma mak hetan ataka hosi militante FRETILIN iha suku Makadiki hodi rezulta hakanek ema nain sia, no kareta ida rahun. Nune’e mós grupu deskoñesidu sira tuda dala rua ba konvoviu AMP nian bainhira sai hosi Vikeke atu ba Baukau, grupu deskoñesidu ne’e mós monta prigu iha estrada klaran ho intensaun atu estraga kareta sira nia roda.

Tuir observasaun Tempo Timor ba kampaña AMP nian iha Vikeke villa katak massa ne'e boot liu massa kampaña FRETILIN iha Aileu no Ainaro. (Oki)

Comment

Militante AMP Nain 9 Kanek Iha Makadiki

Published in Politika
 Kampaña AMP iha Vikeke, Sabádu (05/05). 

VIKEKE – Militante hamutuk nain sia (9) hosi partidu Alliansa Mudansa ba Progresu (AMP) hetan kanek todan, tanba deskonfia hetan atake hosi militante partidu FRETILIN iha suku Makadiki, Vikeke.

Partidu AMP hala’o komisiu iha kampu Vikeke iha loron Sabádu, 5 Maio 2018 ne’ebé partisipa hosi militante tomak iha munisipiu ne’e rasik. Hafoin komisiu ne’e remata, kada militante fila ona ba sira nia hela fatin ida – idak. Militante AMP hosi postu Uatulari bainhira la’o to’o suku Makadiki derepente hetan atake hosi “militante FRETILIN” hodi rezultadu ema nain sira kanek, feto ha’at mane lima no kareta ida mós rahun kedas.    

Insidente ne’e akontese besik hela atividade mini kampaña partidu FRETILIN nian iha suku Makadiki ne’ebé hala’o iha Sabádu, 5 Maio 2018.

Bazeia ba informasaun ne’ebé Tempo Timor asesu katak, iha akontesimentu ne'e vitima sira husu ajuda ba PNTL Uatulari iha fatin akontesementu, infelizmente polisia husik de’it hodi argumenta katak polisia labele atua, tanba massa barak liu. Hafoin ida ne’e mak membru F – FDTL sira mós to’o iha fatin akontesementu hodi tiru sa’e ba leten atu hakalma konflitu ne’ebé akontese entre parte rua. Hosi akontesementu ne’e, membru F – FDTL konsege ka’er tiha ema nain tolu no oras ne’e detein hela iha polisia eskuadra Uatulari nian.

Situasuan ne’e la’ós akontese de’it ba militante AMP nian iha suku Makadiki, maibé akontese mós militante AMP sira seluk bainhira sai hosi Vikeke vila atu ba hala’o tan mini kampaña iha postu Ossu hetan tan ataka (tuda dala rua) hosi grupu deskoñesidu sira inklui tau prigu ba estrada klaran hodi estrada kareta AMP sira nian.

Bainhira to’o postu Ossu, prezidente AMP, Kay Rala Xanana Gusmão atu labele hatan provokasaun hosi partidu seluk ho violensia, maibé tenke tun ba ko’alia didi’ak ho sira hodi nune’e bele evita konflitu.

“Militante AMP mesak ema matenek de’it. Labele hatan provokasaun ho asaun violensia. Tenke mantein paz no estabilidade,” hatete Xanana iha Ossu, Vikeke, Sabádu (05/05).

Atividade kampaña nian sei hala’o iha munisipiu Baukau iha loron Domingo (06/05). (Oki)

Comment

Traballador MM La Fuma Iha Aviaun Laran

Published in Ekonomia
Polisia Unidade Patrulla Fronteira (UPF) hatun hela traballador MM hosi aviaun Air Nort iha loron, Kinta 3 Maio 2018.

DILI – Sekretáriu Estadu Juventude no Traballu (SEJT), Nivio Magalhães rejeita traballador ho naran inisial MM hosi munisipiu Baukau la’ós fuma no baku pramugari iha aviaun laran, maibé traballador ne’e iha problema itoan kona – bá lisan ka kultura iha nia familia uma laran rasik.

Nivio rejeita total informasaun sira ne’ebé espalla iha media sosial (social media) katak problema ne’e nia hun la’ós, tanba baku pramugari no fuma iha aviaun laran, maibé traballador ne’e iha problema itoan ho nia lisan rasik.

Iha loron Kinta, 03 Maio 2018, traballador Timoroan hamutuk nain 24 mak desloka ba Austrália, maibé nain 23 mak ba, no nain ida seluk ho naran inisial MM lakonsege ba, tanba halo problema iha aviaun laran.

“Sira hamutuk nain 24 atu ba serbisu iha Austrália, maibé mosu problema balun akontese iha aviaun Air North laran hanesan hakilar ho lian maka’as hasoru pragamugari sira. nune’e, nia labele halo viajen ba Austrália. Polisia BPU no autoriedade aeroportu hatun tiha nia,” hatete Nivio liuhosi konferensia imprensa iha nia serbisu fatin, Kaikoli – Dili, Sesta (04/05).

Membru governante mai hosi Partidu Demokrátiku (PD) ne’e hatutan, traballador MM nia tuir teste iha tinan 2016. Sira prontu kualker tempu bainhira empreza persija mak sira foin bele tuir tan selesaun ida hodi ba sserbisu iha Australia.

“Rekrutamentu ba MM ne’e via empregu exterior, no mós nia liu hotu hanesan selesaun dokumentu, fiziku ne’ebe hala’o iha tinan 2016. Pasa ho valor D iha teste fiziku,” esplika Nivio.

Iha fulan Outubru tinan 2016, MM tuir kursu lian Ingles iha Lorosa’e English Language Institute (LELI) to’o remata.

“Antes sira ba, sira tuir teste saúde iha klinika Cindranita, rezultadu di’ak katak fizikamente nia saude di’ak, tanba ne’e mak nia priense kriteria atu bele ba serbisu iha Austrália”.

Hafoin akontesementu nee, SEJT Nivio mós hetan ona relatóriu hosi parte imigrasaun no mós dadalia ona ho MM kona – bá problema ne’ebé akontese tiha ona.

“Nia konfesa mai ha’u katak sira hirus malu hela iha sira nia uma lisan,” esplika Nivio.

Trabalador ne’e sei kontinua halo tratamentu saúde, no seidauk iha desijaun final katak nia sei ba Austrália ka la’e.

“Ita hein rezultadu hosi konsultasaun saúde mak ita hare fali, tanba saida mak akontese ne’e nu’udar problema boot ida no afeta tebes ba governu no sira seluk”.

Dadalia entre Nivio ho traballador MM ne’e deklara katak bainhira autoriedade aeroportu no polisia dada sai nia hosi aviaun laran, nia sente buat ida, no foin sente hakfodak bainhira to’o iha edifisiu serbisu imigrasaun nian. (Oki) 

Comment

@2018 - Tempo Timor. Developed by Kalohan.net

Top Desktop version