Problema manutensaun ba transporte no kombustivel durante ne'e sai preokupasaun boot ba forsa armada.

Maibé dadauk ne’e prosesu tenderizasaun hotu ona no hein de'it kompaña ne'ebé manan hodi hahú hala'o serbisu.

"Parte lojístika nia mudansa mak agora foin tender hotu tiha kombustivel forsa sira nian. Foin mak kompañia sira tender hotu tiha, par kompañia sira halo manutensaun ba transporte forsa sira-nian", informa vise xefi estadu F-FDTL Falur Rate Laek iha palásiu prezizdensial Bairro-pite, Kuarta (22/05/2019).

Aleinde ne'e Falur informa mós kona-ba susesu ne'ebé Komandante Komponente sira hetan hodi konsege hasai ro ahi rua (2) ne'ebé durante ne'e iha hela tasi laran.

"Kuaze tinan barak ita foti ema-nia makina boboot iha Timor laran atu halo (hasai), (maibé) nia kapasidade laiha, maibé sira uza meius seluk, ne'ebé merese louvor ba sira".

Nia esplika, husi ro rua ne'ebé hasai mai rai maran ro ida sei monta material hodi bele hala'o fali operasaun, no uza ba treinamentu.

Ba ro ida seluk, Falur dehan sei rai hela atu aban-bainrua hatama iha muzeu nasional.

"Ro rua ne'e ida ita halo kanabaliza tiha para tau fali ninia material seluk hodi halo operasaun ho seluk, sai ba hanesan treinamentu forsa ninian, no ida fali ita rai hela para aban-bainrua ita rai ba muzeu nasional ita-nian", dehan Falur.