"Situasaun iha teritoriu laran tomak la'o hakmatek maske iha insidente balun iha fulan rua ka tolu ne'ebé akontese iha Dili, Baukau, no Likisá liga ba asaltu malu ho grupu arte marsial no rama ambon no kazu omesidu balun ne'ebé akontese", dehan Diretór Ezekutivu Fundasaun Mahein, João Almeida, iha nia knaar fatin Fomentu I, Kinta (25/4).

Nia hatutan, atu halo prevensaun ba akontesimentu sira ne'e importante liu mal husi parte Polísia Nasional Timor Leste (PNTL) hodi bele garante liu-liu vizibilidade polísia nian iha bairu no mós iha fatin públiku sira.

Kazu sira akontese iha Dili ne'e akontese iha estrada hanesan asaltu rama ambon ne'e bainhira ema halo viajen no ema komunidade sira halo movimentasaun maka foin akontese kazu sira hanesan ne'e.

Tuir nia, importante tebes servisu polísial nian, liu-liu prevensaun liga fila-fali ba kazu arte marsial, rama ambon nafatin iha kazu sira hanesan ne'e lori impaktu negativu no hatauk komunidade nia liberdade movimentasaun iha fatin públiku.