“Iha loron 12 Maio AMP tenke manan atu hadia Estadu. Governu ida ho maioria parlamentar, maioria absoluta. Governu ida ho kbi’it atu ukun. AMP mós tenke manan hodi defende riku soin Timor nian. Fronteira maritima mana tiha ona, loos. Riku soin mak ita sei la’o hela,” hatete Xanana bainhira hasoru malu ho grupu juventude no grupu arte marsiais sira iha salaun igreja katedral Dili, Sabádu (24/03).
“La’ós tanba Xanana atu sai primeiru – ministru ka Ruak mak atu sai primeiru – ministru mak ita hamrik iha ne’e, ita tur hasoru malu atu vota ba AMP. Iha rajaun rua, ida hadia Estadu, no ida seluk atu garante ita nia riku soin. Bainhira ita garante ona ita nia riku soin, ida ne’e funu libertasaun nasionál hotu ona”.
Xanana mós husu ba militante no simpatizante sira atu labele uja susesu fronteira maritima iha tempu kampaña, maibé esplika de’it ba povu kona – bá saida mak akontese durante fulan ne’e nia laran.
“La’ós ha’u tauk atu halo debate kona – bá fronteira maritima, la’e, maibé la persija. Ita tenke boot liu ita nia ulun, tanba atu ko’alia karik katak durante tinan 30 lalika ko’alia fronteira maritima. Hosi 2006 to’o 2036 labele ko’alia fronteira maritima, Greater Sun Rise mak produz karik iha tinan 2036 mak sei iha . . . ida ne’e lalika ko’alia to’o Greater Sun Rise maran mak foin ita ko’alia. Ne’ebé, ita lalika liga buat sira ne’e,” esplika Xanana.
“Atu dehan de’it lalika, tanba la’ós ha’u tauk atu ba debate. Ha’u lakohi ba perde (lakon) tempu, maibé agora tenke prepara ba kampaña no eleisaun”.
“Iha Bayu Undang ó han barak tiha ona mak ó mai hakarak han tan Greater Sun Rise. Tanba ne’e Greater Sun Rise tenke mai. Tanba ida ne’e mak AMP tenke manan”. (Oki)