Komisariu Duarte hatutan, iha partidu koaligasaun 4, no partidu ketak – ketak entre 5 ka 6 mak oras ne’e rejista ona, maibé regra hatudu katak Tribunal Rekursu mak sei verifika durante loron 10 nia laran depois mak admite partidu ne’ebé de’it, no sei notifika partidu sira karik iha reklamasaun sira iha loron rua de’it hodi halo reklamasaun, Tribunal Rekursu mós iha tan loron ida hodi desidi. Hafoin prosesu ne’e remata mak foin hakat ba sorteiu hodi hatene loloos partidu ne’ebé mak sei konkore no admitidu hosi Tribunal. 

Nia hatutan, oras ne’e CNE hala’o hela edukasaun sivika sei enkoraja nafatin votante sira, maibé bazeia ba esperiensia ne’ebé iha katak votante sira hosi munisipiu Dili mak nia partisipasaun ne’e menus liu, tanba dehan ema hotu – hotu matenek ona ne’ebé ema lakohi atu ba vota. 

“Partidu politika sira iha dever tenke fó hatene ba militante sira hodi bele enkoraja apoiante sira ka simpatizante sira ba vota,” hatete komisariu Duarte ba Tempo Timor. 

“Votu ne’e sekretu, no votu la obrigatóriu, tanba ita nia konstituisaun dehan resensiamentu ne’e obrigatóriu, maibé votu ne’e sivika kada sidadaun. Espera katak povu iha rai ida ne’e bele ezerse sira nia direitu votu ho didiak, no vota tanba ita nia votu ne’e determina futuru mudansa nasaun nian”. 

Preparasaun seluk CNE nian mak oras ne’e rekruta hela Ofisial Monitorizasaun, tanba sei tau iha kada sentru votasaun iha estasaun votu. Resensiamentu sei remata iha loron 28 Marsu, tanba lei esplika katak durante loron 30 antes tama ba eleisaun tenke públika lista eleitor sira, tanba sira hadau malu lista ne’e se mak barak liu.  

“Husu ba parpol sira tenke informa ba militante sira ne’ebé iha kartaun eleitoral tenke ba vota iha loron ne’ebé determinadu ona, tenke evita prátika krime eleitoral, labele aproveita aktu eleitoral ne’e hodi halo fali aktu kriminal, tanba eleisaun ne’e la’ós hala’o iha Timor de’it, maibé mundu tomak tau matan hela ba ita nia festa demokrásia ne’ebé la’o dadauk iha Timor – Leste,” hamenon komisariu Duarte.

Kampaña eleitoral sei hahu iha loron 10 Abril, no eleisaun sei akontese iha loron 12 Maio 2018.