Tuir dadus ne’ebé PR Lu Olo iha, maske la fó sai númeru, maibé iha veteranu balun ne’ebé to’o ohin laiha uma hodi hela.

“Ohin rona mós preokupasaun prezidente repúblika ninian, liu-liu ba asuntu sira ne’ebé mak sempre transmite ba governu hodi tau atensaun, hanesan veteranu sira nian. Nia (PR) hatete beibeik ne’ebé ke nia insiste,” dehan PM Taur hafoin hasoru-malu ho PR Lu Olo iha palasiu prezidensial Bairro-pite, Segunda (10/06).

“Veteranus ne’e iha buat barak, balun veteranu sira ne’ebé mai uluk 24 anos mai ke balun uma laiha, señor prezidente preokupa ida ne’e,” dehan PM Taur.

Ba problema veteranus nia, xefe governu hatete, daudauk ne’e Konsellu Kombatente sira hala’o serbisu maka’as, no iha loron 1 to’o 3 Marsu 2020 sei realiza konferensia.

PM hatutan, PR Lu Olo mós levanta kona-ba opiniaun balun ne’ebé konkorda no la konkorda.

“Ha’u dehan ba señor prezidente katak tuir lei governu implementa buat ne’ebé mak akordu ho lei. Agora opiniaun ne’e opiniaun, opiniaun ne’e labele invalida ho buat ne’ebé mak lei.”