Login to your account

Username *
Password *
Remember Me

"Malisan" Fahe Ukun ba Familia, Da'et ba PM Taur Featured

PM TMR iha hela ninia meza serbisu gabinete PM nian PM TMR iha hela ninia meza serbisu gabinete PM nian Foto Media PM

Tempotimor (Dili) - Primeiru Ministru Taur Matan Ruak ne'ebé lidera VIII Governu Konstitusional hahú implementa politika fahe ukun no fó previlejiu ba familia. Politika ida ne'ebé uluk banhira sei sai Prezidente Repúblika, Taur kontra maka'as tebes.

Fó hanoin fila fali ba deklarasaun Taur Matan Ruak iha 25 Fevereiru 2016 bainhira sei asumi kargu nu'udar Prezidente Repúblika. Iha tempu ne'eba Taur hato'o deklarasaun forte ida ba ukun-nain sira.

Iha tempu ne'ebá bainhira hato'o mensajen iha Parlamentu Nasionál, Taur deklara katak nia aviza ba Primeiru Ministru VI Governu Konstitusional, DR. Rui Maria de Araujo relasiona ho informasaun husi ema balun ne'ebé hatete ba nia katak familia Xanana ho Mari Alkatiri nian no nia amigu sira hetan previlejiu barak liu iha kontratu estadu nian.

"Ha'u iha 4 Fevereiru aviza no pasa informasaun ba Sr. Primeiru Ministru (Rui Maria de Araujo), ema mai ko'alia ho Prezidente Repúblika lamenta, hateten katak familiares Maun Xanana no Mari (Alkatiri) nian ho nia amigu sira hetan previlejiu barak liu iha kontratu estadu nian. Sr. Primeiru Ministru (Rui Maria de Araujo) husu "Prezidente Repúblika hakarak halo inspesaun?" Ha'u dehan lae. Ha'u hakarak fó ba ita-boot par hatene katak iha dezkontentanamentu kona-ba previlejiu sira ne'e."

"Suharto (eis Prezidente Repúblika Indonezia), nia familia sira mak hatun nia. Previlejiu demaziadu," deklara Taur iha altrua ne'ebá.

Maibé hafoin kaer ukun iha Governu Aliansa Mudansa ba Progresu (AMP), Taur mós tama ba "kuak" ne'ebé hanesan. Ikus liu ne’e, PM Taur nia prima ne'ebé nu'udar eis madre salesiana ida hetan mós previlejiu ba kontratu estadu nian atu sai embaixadora, husi ukun ida ne'e.

Aviza ne'ebé uluk Taur Matan Ruak "dedika" ba Xanana ho Alkatiri no deklara ho orgullu iha uma fukun Parlamentu Nasionál hanesan fila hikas ba "nain".

Tuir dokumentu ofisial husi palasiu governu ba lista kandidatu embaixadór na'in 15 ne'ebé governu aprezenta ba Prezidente Repúblika, iha mós naran husi PM Taur nia prima, Joana Veneranda Amaral hamutuk ho naran sira seluk.

PM Taur nia prima ne'ebe rezigna a’an husi Madre Salesiana depois de Timor Leste hetan ukun rasik a’an ne’e hetan nomeiasaun hodi reprezenta Timor Leste nu'udar embaixadora iha Santa Sé, Vatikanu.

"Senhora Joana Veneranda Amaral, embaixadora da Republica Demorcratica de Timor Leste na Santa Sé," hakerek iha karta ho lian Portuges ne'ebé asina husi PM Taur.

Iha dokumentus ne'e iha mós naran husi kandidatu embaixadór na'in tolu (3) ne'ebé nomeia husi VII Governu Konstitusional ne'ebé lidera husi PM Alkatiri, hanesan Olimpio Maria Alves Gomes Miranda Branco  embaixadór ba Brazil,  Isilio Antonio de Fátima Coelho da Silva embaixadór ba Estadus Unidus Amerika, no Lisualdo Menezes Coimbra Gaspar embaixadór ba Nova Zelandia.

Diplomata Timor-oan na'in 3 ne'e hetan ona aseitasaun husi nasaun ne'ebé sira sei hala'o knar ba, nune'e Governu AMP la uza ninia kompetensia atu kansela naran sira ne'e hodi propoin fali naran seluk.

Molok ne'e Ministru Negosiu Estranjeiru no Kooperasaun Dionisio Babo esplika kona-ba prosesu nomeiasaun embaixadór ne'ebé VIII Governu halo. Ministru Babo dehan, MNEK aprezenta lista ba kandidatu embaixador sira ba Konsellu Ministru hafoin hetan apoiu, Primeiru Ministru sei lori ba Prezidente Repúblika hodi bele konsidera.

“Se la sala purvolta 15 pesoas mak ita propoin ona ba Prezidente (Repúblika) atu konsidera, na'in 15 seidauk iha lei atu simu pose, so na'in tolu mak hetan agreement ona husi nasaun residente,” dehan Ministru Babo.

Normalmente, nia dehan, bainhira mosu governu foun bele halo mudansa ba embaixadór ka lista kandidatu embaixadór, maibé tenke konsulta nafatin ho PR.

“Ne'ebé haruka tiha ba señor Prezidente (Repúblika). Señor Prezidente sei konsidera hela, ita hein hela. Kuandu konkorda ona bele iha mudansa,” dehan nia.

Hafoin PR konkorda no hetan aprovasaun, MNEK sei haruka karta ba nasaun sira ne'ebé sei haruka embaixadór ba hafoin hetan konkordansia husi nasaun hirak ne'e foin bele fó pose.

“Sira neebé hetan ona agreement bele ba ona, ba sira ne'ebé seidauk hetan agreement, agreement ne'e hanesan aseitasaun husi nasaun ida simu, ne'e mak ita hein fulan ida, fulan rua, fulan tolu, haruka agreement mak sira foin ba.”

“Ne'ebé iha faze lubuk ida. Governu hato'o, señor Prezidente konsidera. Se konkorda ona, ita haruka ba nasaun ida ne'ebé simu ne'e. Nasaun ida simu ne'e konkorda ona haruka fali mai depois mak ita halo tomada posse,” nia esplika.

Entretantu, tuir lista ne’ebé governu aprezenta naran husi kandidatu embaixadór sira mak hanesan tuir mai ne’e:

  1. Ines Maria de Almeida, embaixadora Timor Leste (TL) ba Cambera, Australia
  2. Gil da Costa, embaixadór TL ba Reinu Unidu Gra-Britania no Irlandia Norte
  3. José Luis Guterres, Embaixadór TL ba Konfederasaun Suisa
  4. Paulo Assis Belo, Embaixadór TL ba Republika Mosambike
  5.  Lisualdo Menezes Coimbra Gaspar, embaixadór TL ba Wellingtong, Nova Zelandia
  6. Isilio Antonio de Fatima Coelho da Silva, embaixadór TL ba Washington DC, Estadus Unidus Amerika
  7.  Isabel Amaral Guterres, embaixadora TL ba Lisboa, Portugal
  8.  Isabel Amaral Guterres, reprezetante permanente TL ba Sekretariadu Ezekutivu CPLP
  9.  Isabel Amaral Guterres, embaixadora la rezidente TL ba Republika Kabo Verde
  10. Olimpio Maria Alves Gomes Miranda Branco, embaixadór TL ba Republika Federativa Brazil
  11. Maria Natalia Guterres Viegas Carrascalao, embaixadora TL ba Singapura
  12. Ilidio Ximenes da Costa, embaixadór TL ba Japaun
  13. Hermenegildo Lopes, embaixadór TL ba Kambodia
  14. Abrão dos Santos, Embaixadór TL ba Republika Popular Xina
  15. Joana Veneranda Amaral, Embaixadora TL ba Santa Se
  16. Armandina Maria Gusmão dos Santos, Embaixadora TL ba Reinu Tailandia
Rate this item
(10 votes)
Last modified on Sunday, 09 June 2019 09:41
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com
Darwin_Optic

Popular

Error: No articles to display

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com

Kalendariu Arkivu

« March 2024 »
Mon Tue Wed Thu Fri Sat Sun
        1 2 3
4 5 6 7 8 9 10
11 12 13 14 15 16 17
18 19 20 21 22 23 24
25 26 27 28 29 30 31

Tempo Timor Networks

Online Counter