PM Taur iha Tersa (28/05) tuku 14.15 OTL telefone ba lider Partidu Liberal, Scott Morrison, hodi hato’o felisitasaun ba vitoria ne’ebé hetan liu husi eleisaun iha 18 Maiu liu ba. Ho vitória refere, Scott Morrison sei lidera fila-fali Governu foun tuir mai nu’udar Primeiru Ministru.
Liu husi konfersa iha telefone, PM Taur mós konvida Scott atu mai vizita Timor Leste hodi partisipa iha komemorasaun tinan 20 Referendu no INTEFRET sama ain iha Timor Leste, ne’ebé sei selebra iha fulan Agostu no Setembru tinan ne’e.
“Xefe Governu Timor Leste dehan ba Scott Morrison katak, Governu ne’ebé nia lidera iha vontade no kompromisu hodi serbisu hamutuk ho Governu foun Austrália nian ne’ebé sei froma, ba intrese povu no Estadu rai rua nian,” informa gabinete PM liu husi komunikadu ne’ebé Tempo Timor asesu, Tersa loraik.
Primeiru Ministru Scott Morrison agradese tebes ba telefone no reteira mós Governu foun Austrália nia vontade no kompromisu atu serbisu hamutuk di’ak liu tán ho Governu Timor Leste iha tempu oin mai.
Relasaun Timor Leste ho Austrália hahú kedas iha funu mundial daruak. Relasaun ne’e kontinua iha tempu okupasaun Indonézia, Australianu barak mak sai ativista ba Timor Leste nia auto determinasaun, no iha 1999 Austrália lidera INTEFRET tama Timor Leste hodi rekopera fila-fali pás no estabilidade pós Referendu, no sai país ida ne’ebé ajuda Timor Leste nia konstrusaun iha área oioin to’o ohin loron.