Osan ne'ebé Ministériu Finansas sei koa mak osan viajen ba rai li'ur, osan aluga karreta, no osan ense mina.
Ministra Finansas Interina Sara Brites hato'o kestaun ne'e hafoin hasoru-malu ho Primeiru Ministru Taur Matan Ruak iha Palasiu Governu.
Iha enkontru ho PM Taur, Ministra hatete, aleinde koalia kona-ba prioridade ne’ebé atu implementa iha munisipiu, koalia mós kona-ba planu atu koa despeza balun ne'ebé la nesesariu.
"Iha despeza balun ne'ebé mak governu haree katak deznesesáriu entaun atu koa. Presiza prepara dadus par informa", dehan Ministra Sara, Tersa (21/05/2019).
Maske la esplika total orsamentu ne'ebé governu sei koa, maibé Ministra ne'e hatete dw'it katak, ida ne'ebé atu koa mak despezas parte rekerente nian.
"Hanesan viajen ba rai li'ur, despeza aluga kareta, enxe mina. Koa ida ne'e despezas ne'e bele poupa entaun bele tau fali ba despeza seluk," nia esplika.
Tuir nia, koa despezas la nesesariu ne'e hanesan planu governu nian atu bele iha efisiensia liu iha alokasaun, liu-liu iha area ne'ebé fó moris di'ak ba povu.
"Koa despezas ba ida ne'e planu governu nian par atu efisiensia liu iha alokasaun, liu-liu tau liu ba iha área ne'ebé fó benefisia liu ba iha bein estar povu ninian", dehan mimistra ne'e.