Maibé, atu prosesu dezenvolvimentu iha nasaun ida bele la’o, la’os koalia de’it kestaun pas no hakmatek, maibé importante mós mak estabilidade governasaun. Tanba governu mak iha papel atu hala’o prosesu dezenvolvimentu nasionál.
Hanesan públiku hatene, to’o ohin loron governu Aliansa Mudansa ba Progresu ne’ebé lidera husi Primeiru Ministru Taur Matan Ruak, seidauk la’o ho loloos, tanba membru governu iha VIII Governu Konstitusional ne’e la kompletu.
"Prezidente da Republika rejeita fo pose ba membru Governu sira ne'ebe pendente governu ne'ebe lidera husi Primeiru Ministru Taur Matan Ruak la estabel no sei fo impaktu negativu ba exekusaun orsamentu ne'ebe mak Parlamentu sira aprova on a," dehan Agapito D.C. Ximenes, (32) komunidade ida husi Bidau.
Prezidente Repúblika ne’ebé iha poder atu fó pose ba membru governu sira, pendente lista kandidatu membru governu na’in sia (9). PR Lu Olo husu ba AMP atu aprezenta lista foun, maibé AMP nafatin mantein, ho nune’e estabilidade governasaun AMP mós sei iha nafatin pontu interogasaun (?) nia laran.
Sees husi estabilidade governasaun ne’e, iha komemorasaun loron restaurasaun independensia ba dala 17 ho tema “Haforsa Unidade no Garante Estabilidade atu Hala’o Dezenvolvimentu Nasionál”, PR Lu Olo husu ba komponente hotu-hotu atu unidade.
“Ho dezenvolvimentu mak ita hetan dame. Dezafiu ne’e ezije unidade. Ho pás no estabilidade mak ita bele hala’o dezenvolvimentu ida ne’ebé halibur ema hotu atu bele lao ba oin ho susesu. Pás no dezenvolvimentu labele lao keta-ketak", deklara PR Lu Olo liu husi nia diskursu iha palásiu prezidensial Nicolau Lobato, Segunda (20/05/2019).
Tuir PR Lu Olo, tenke hametin unidade hodi garante estabilidade, maibé unidade ne’e tenke hatuur ho regras, prinsipiu no valor sira.
“Unidade hametin ho prinsípiu inkluzaun katak la hasees ema ida. Tanba maturidade ita-nia povu nian mak ohin ita iha estabilidade,” dehan Lu Olo.
Xefe Estadu agradese mós ba F-FDTL no PNTL ne’ebé garante autoridade estadu no estabilidade iha Timor Leste.
“Ho estabilidade de'it mak bele lori dezenvolvimentu ba oin no ba beibeik”.
Iha oportunidade ne’e, PR Lu Olo konta mós kona-ba prosesu inisiu luta ba ukun rasik aan ne’ebé hahú husi grupu nasionalista kiik ida ne’ebé lidera husi Prezidente Nicolau Lobato molok rezime Salazar monu iha 24 Abril 1974, iha Portugal.
“Konxiénsia nasionál mosu tanba grupu kiik ne’e konsege haree katak ita, Timor-oan, iha patrimóniu kulturál boot ne’ebé dada ita hamutuk. Haree mós katak ita, Timor-oan, iha identidade rasik no iha matenek, kbiit atu bele ukun rasik-an. Sira haree mós ba ita-nia beiala sira-nia istória hasoru kolonializmu iha reinu idaidak", dehan Lú Olo
Hahú husi ne’e, neneik-neneik, sentimentu katak ita pertense ba moris fatin ida de’it, hakotu fronteira entre reinu sira, entre rasa, entre mane no feto, entre liurai no atan, entre fiar-nain husi relijiaun oioin, entre lorosa’e no loro monu.
“Ohin loron, ita bele dehan katak identidade ida ne’e mak halo ita hotu-hotu orgullu-an nafatin, nu’udar Timor-oan, moris iha uma-kain ida de’it mak ita-nia pátria, Timor Leste,” deklara PR Lu Olo.
