Kompañia sira ne'ebé hetan ona lisensa mak hanesan Montana Diak, Aspalink, Vila Matan Ruak no Diresaun Nasional DRBFC-MOP.
“Semana rua kotuk ami fó lisensa hamutuk 24 no ohin ami fó tan lisensa 12, ne’e hatudu produtividade servisu ami-nian", dehan Sekretariu Estadu, Demetrio Amaral, iha servisu fatin, Mandarin-Dili, Sesta (26/4).
Lisensa ne'ebe hasai ho kategória B ne’e estudu ambiental simplifikadu no analiza planu ambiental, tanba kada projeitu iha planu ambiental. Nune'e, ba kategória C ne’e rekomendasaun deit.
Nia hatutan, parte Sekrétariu Estadu Ambiente nian konsege mellora ona servisu, maibé presiza tan kondisaun para garantia ba kualidade no tuir duni rekomendasaun sira ne’e.
Membru govenru ne’e hakle’an iha Dekretu Lei nú. 5/2011 fó lisensiamentu ambiental ne’e iha klasifikasaun tolu mak lisensa kategória C ba atividade kiik, lisensa kategória B ba atividade ne’ebé bele fó impaktu médiu ba ambiente, no lisensa kategória A bele impátu boot ba ambiente.
Dezde asume funsaun ne'e iha 20 Juñu 2018 to’o agora, Sekretáriu Estadu Ambiente emite ona lisensa ambiental 220, kompara ho tinan uluk liu ne’e kuaze servisu tinan rua nian.
