Diretor Ezekutivu Asia Jistice and Right (AJAR), José Luis Oliveira hateten, Konstituisaun define klaru katak, membru deputadu no membru governu goza imunidade, maibé imunidade ne’e atu proteje sira bainhira sira hala’o knaar no proteje sira husi krime menor la’os krime boot ho ninia akuzasaun menus husi tinan rua.

“Imunidade la proteje sira husi krime boot, hanesan Francisco Kabuadi Lay ne’e. Nia komete krime rua, ida partisipasaun ekonomia ida seluk brankamentu kapital. Krime rua ne’e boot, ne’ebé laiha relasaun ho ninia knaar, tuir loloos la presiza husu lisensa ba Parlamentu ka Xanana. Loloos Prokuradór haruka polísia ba kaer kedas”, tenik nia, iha servisu fatin, Sesta (15/3).

Maibe ho intervensaun no politika 'má fé' ne'ebé mosu iha rai ne'e halo tribunál sofre diskriminsaun no presau husi polítiku sira.

Haree ba situasaun ne'e, hatudu katak realidade justisa Timor-Leste nian ne'e ba povu ki’ik de’it.

Ukun na’in sira ne’ebé hetan ona sinál husi tribunál katak komete iha erru ruma, maibé nafatin asume pasta iha orgaun Estadu nian.

"Ne’e mak povu ki’ik sira sente iha situasaun injustisa ba sira, la justu ba sira. Bainhira povu ki’ik hetan prosesu ruma, diretamente ba tribunál, maibé ema boot ruma hetan prosesu, ita polítiza tuun sa’e hodi halo ema ne’e la ba asume responsabilidade", dehan nia.