“Orsamentu ha’u promulga ona. Klaru orsamentu ba povu ninia, i ha’u husik ba ezekutivu para atu bele ezekuta osan ida ne’e, hodi bele responde povu nia nesesidade tuir sira-nia planu no programa”, tenik nia, iha Palásiu Nobre Lahane, Sesta (8/2).
Nia hatutan, husik ba Parlamentu Nasional para atu bele halo fiskalizasaun didi’ak hodi osan ida ne’e bele fila duni ba povu no atu hadia povu nia moris.
PR Lù Olo dehan, Parlamentu Nasional la muda orsamentu ba setor produtivu sira, entermus pursentu sa’e maibé iha parte nominal osan nafatin hela de’it.
"La signifika dehan ha’u konkorda ho plítika ne’ebé parlamentu halo, maibé ha’u bele hateten katak orsamentu mak ida ne’e duni. Se sira dehan orsamentu mak ne’e duni atu hadia povu nia moris, entaun husik ba sira hadia povu nia moris, pois mak ita haree”, dehan nia.
Entretantu kona-ba kandidatu membru governu pendente, maibe PR Lù Olo konsidera ne'e kompetensia Governu nian atu hili se de’it mak atu sai membru governu.