DILI – Timor – Leste (TL) oras ne’e ameasadu atu “sai nakukun (black out) total” iha teritóriu nasionál, tanba problema governu seidauk selu empreza ne’ebé fornese kombustivel ba estasaun eletrisidade Hera no Betano.
Nu’udar anunsia ona hosi governu katak eletrisidade sei mate iha loron 21/07/2018 maibe parte governu halo esforsu hamutuk ho kompañia fornesedor kombustivel ba sentral elétrika Hera atu garante ahi labele mate. Iha semana kotuk governu husu ba kompañia atu hatama lalais kombustivel mai iha TL iha loron Sabado, 18 Agostu 2018.
Kompañia Esperansa Timoroan (ETO) kumpri pedidu governu nian hodi konsege lori kombustivel ho ró ida naran Angell 33 to’o ona iha portu Hera iha loron Sabado, 18 Agostu 2018 horas tuku 10.00 dadersan.
Governu TL deve kompañia ETO ho montante Millaun tolu nulu resin tolu pontu ualu Dollar Amerikanu, nune’e iha momentu ne’e kompañia laiha osan atu selu taxa ba governu, maibé mina ne’e atu hatun hosi ró. Governu liliu Ministéiru Finansa obriga kompañia tenke selu uluk taxa ho osan kuaje besik USD 490,000.
“Ró ida tula kombustivel ne’e atraka tiha ona iha portu Hera desde Sabadu, maibé to’o agora seidauk bele deskarga ka hatun mina ne’e hodi hatama ba sentru eletrika Hera nian, tanba governu dehan tenke selu taxa lai mak bele hatun, maibé kompañia mós osan laiha ona hodi selu taxa, tanba goveru deve hotu tiha ona kompañia,” esplika traballador ETO nian ida ba Tempo Timor foin lalais.
Traballador ne’e hatutan, se governu atual mak la solusiona kestaun ne’e mak iha posibilidade ahi sei mate hotu iha rai laran, tanba mina mak laiha duni ona. 
Entretantu, antes ne’e mós diretor produsaun eletrsidade Timor – Leste, Inácio de Jesus Leite katak iha empreza rua mak durante ne’e fornese kombustivel ba sentral eletrika Hera no Betano (Manufahi). Empreza rua ne’e mak SACOM ho ETO. Governu deve hela empreza ETO nian hamutuk millaun US $ 33, no deve mós SACOM nian hamutuk millaun US $ 6.
Iha 27 Abril 2017, Komisaun Nasional ba Aprovizionamentu (CNA) anúnsiu nia intensaun atu ajudika kontratu ho montante liu tokon $90 atu fornese kombustivel ba sentru elétriku Hera no Betano, ba tinan rua oin mai nian. Iha pasadu, kontratu sira hanesan ne’e fó de’it ba durasaun tinan ida, tanba possivel atu iha governu foun, entaun kontratu ba tinan rua ne’e asegura benefísiu ba fornesedór atuál sira. (Oki)
