Julie Bishop

DILI – Ministra Negósiu Estranjeiru Austrália, Julie Bishop hato’o parabéns ba povu Timor – Leste, liliu ba partidu koaligasaun Aliansa Mudansa ba Progresu (AMP) ne’ebé hetan votu maioria iha eleisaun antisipada foin lalais.

“Ha’u fó parabéns ba povu Timor – Leste ne’ebé hala’o ona eleisaun parlamentár ho susesu, no ba Aliansa Mudansa ba Progresu (AMP), lidera husi S.E. Xanana Gusmao, ne’ebé hetan votus maioria,” hatete Bishop liuhosi komunikadu imprensa ne’ebé Tempo Timor asesu.

Bishop hatutan, observadóres Austrália no internasionál konfirma ona katak eleisaun sira foin lalais ne’e hala’o ho dame no ordenadu. Timoroan barak mak partisipa hodi ezerse sira nia direitu ba vota.

“Ha’u mos fó parabéns ba autoridades eleisaun no seguransa nian kona-ba sira nia servisu ba iha eleisaun”.

Austrália mak Timor – Leste nia parseiru dezenvolvimentu no seguransa ne’ebé boot-liu. Hanesan viziñu ne’ebé besik – malu.

“Ita sempre fahe interese ba malu no hametin ligasaun ema-ba-ema. Ami sei servisu hamutuk ho governu foun atu lori ba oin ita nia tratadu istóriku kona-ba estabelesimentu fronteira maritima permanente ne’ebé foin lalais ita asina”.

“Ami hein hela tomadepose Primeiru-Ministru no Gabinete foun, tamba Governu Austrália komprometidu nafatin ba kooperasaun ne’ebé metin-liu entre ita nia nasaun”.

Entretantu, Tribunal Rekursu proklama ona rezultadu eleisaun antisipada katak partidu koaligasaun Aliansa Mudansa ba Progresu (AMP) mak sai nu’udar partidu manan nain iha eleisaun ne’e ho total votu 309.663 (49,6%) fahe ba kadeira hamutuk 34.

Entretantu, partidu manan daruak mak partidu FRETILIN ho total votu 213.324 (34,2%) fahe ba kadeira 23 de’it. Tuir fali Partidu Demokraátiku (PD) ho total votu 50.370 (8,1%) fahe ba kadeira 5, partidu koaligasaun Frente Dezenvolvimentu Demokrátiku (FDD) hetan votu hamutuk 34.301 (5,5%) fahe ba kadeira 3. (Oki)