Print this page

Insendiu Merkadu Manatuto, Deskonfia Ema Sunu Featured

Insendiu Merkadu Manatuto, Tersa (28/05) Insendiu Merkadu Manatuto, Tersa (28/05) Foto Especial

Tempotimor (Manatuto) - Iha Tersa (28/05) kalan maizumenus tuku 20.00 OTL, ahi haan merkadu foun Manatuto Villa ne'ebé lokaliza iha aldeia Belebatu, Suku Ailili.

Tuir informasaun inisial husi sasin ida ba tempotimor, deskonfia ahi ne'e mosu tanba sirkuitu eletrisidade iha negosiante balun nia fatin negosiu iha parte klaran.

Ho lalais ahi ne'e da'et ba uma sira seluk iha merkadu laran no sai boot liu tan. Negosiante ne'ebé hetan apoiu husi komunidade balun koko atu hamate maibé la biban.

"Ahi haan moos uma sira iha parte klaran. Uma sira iha ninin, besik estrada ne'e mak ahi la konsege haan," informa joven Manatuto ida, Zefri ba tempotimor via whatsapp.

Zefri informa, problema bee-menus no anin halo esforsu komunidade sira atu hamate la konsege hetan rezultadu.

"Kompaña Zonize haruka bee tanki ida ba atu lalin hodi rega, maibé la konsege hamate ahi," nia dehan nia.

Entretantu, tuir informasaun husi membru autoridade seguransa ne'ebé lakohi publika ninia identidade, deskonfia ahi la'os mai husi sirkuitu eletrisidade maibé ema balun mak sunu.

Membru seguransa ne'e dehan nia parte deskonfia kazu konfrontu entre grupu artemarsiais ne'ebé akontese iha Kaikua, Postu Administrativu Vemase, Munisípiu Baukau mak "da'et" to'o Manatuto.

"Iha informasaun inisial ne'ebé iha presiza klarifika liu husi investigasaun. Balun dehan ahi sirkuitu mak hamosu insendiu ne'e. Maibé iha mós deskonfia ema mak sunu merkadu foun Manatuto ne'e," dehan membru autoridade seguransa ne'e.

Tempo Timor koko kontakt Kmandante PNTL Munisipiu Manatuto liu husi númeru telefone 7731 23XX maibé númeru ne'e dezligadu.

 

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

Related items