Dirijente Kooperativa CU-HIKHMOR, Lurdes Mendonca Ramos informa, kada tinan sempre fahe hahán bázika ba nia membru sira iha fin du anu.
"CU HIKHMOR fahe ba família sira, iha tinan kotuk (2021) fahe ba membru kooperativa de'it maibé tinan ida ne'e (2022), ita haree ba membru no orsamentu mós aumenta, ne'ebe fo mós apoiu oituan-oituan ba ema kbi’it laek no ema ho difisiénsia sira hotu", dehan nia ba www.tempitimor.com via telefone, kinta, (22/12).
Nune’e, hahán ne'ebé fahe mak hanesan, fós, sardina, mina, supermie, deho, trigu, maling, masin, masako no seluk tan.
Benefisiáriu ho difisiénsia no kbi’it laek, ne'ebé la'ós membru ba kooperativa CU-HIKHMOR hamutuk na'in sia (9).
"Fahe ba membru CU-HIKHMOR hamutuk 441 no sira ne'ebé la tama iha CU-HIKHMOR hamutuk ema na'in sia (9), nune’e totál hamutuk 450" akresenta nia.
Kooperativa CU-HIKHMOR durante ne’e, halibur ema hodi tau osan hamutuk, nune'e dirijente sira desidi kada tinan sempre fahe osan funan ba membru sira, maibé iha tinan 2022 fahe mós hahán ba membru.
Orsamentu ne'ebé Kooperativa Kréditu Uniaun Hikis Kosar Hadia Moris (CU HIKHMOR) gasta hodi sosa ba hahán hirak ne’e, hamutuk rihun US$5. (*)