Preokupasaun boot ne’ebé durante EBF Kaibada Makasa'e hasoru mak hanesan, kondisaun uma grave difikulta prosesu aprendizajen iha tempu udan.
Maibé, hafoin vizita husi PR Lú Olo nian iha tinan 2020 fó kedas informasaun ba Ministru Edukasaun Juventude no Desportu (MEJD) atu responde preokupasaun ne’ebé sira hasoru.
"Prezidente dehan, ida ne'e tenke halo, tanba uma aat ona, tanba ne'e ami sente vizita ne'e milágre ba ami, ami iha liu ai-laran ne'e, pois halo nusá ema ida boot hanesan ne'e, mosu derepente iha ne'e, entaun ami kontente, ami hato'o ami nia susar ba nia, nia la haluha ami-nia husu ne'e", dehan Domingos ba www.tempotimor.com, iha nia kna'ar fatin, kinta (09/12).
Nune’e, MEJD fó ona resposta pozitivu no sei halo tranferensia orsamentu ba EBF Kaibada Makasa'e ho montante purvolta rihun US$117.00, ne’ebé tuir planu iha tinan 2022 atu halo konstrusaun foun ba sala aprendizajen 5 no ida ba mestri sira.
"Ami konta bankaria loke hotu ona, númeru rekening iha hotu ami-nia liman, hein osan tama hahú ona", nia dehan
Tanba ne'e, agradese ba PR Lú Olo ho nia komitiva tomak, tanba liuhusi vizita ne'e bele responde ona eskola EBF Kaibada Makasa'e nian problema.
Mestri, Sebastiao Ximenes Raidi mós sente kontente ho PR Lú Olo nia vizita ne’ebé promete atu konstrui edifisíu foun.
"Ami kontenti apoiu ne'e, tanba durante tempu udan anin ne'e prosesu aprendijasem la la'o, ami iha sala-7, maibé uza de'it sala-4, sala-3 ami la uza, tanba dodok ona", nia hatete
Entertantu, eskola EBF Kaibada Makasa'e iha ninia estudante hamutuk ema na’in-183 ne’ebé kompostu husi primeira anu to'o sestu anu no iha mestri hamutuk na'in-7. (*)