José da Silva, nu'udár komunidade ne'ebé hela besik iha área ne'e informa, durante udan tau kalan ne'e, sira la toba, maibé hadeer de'it to'o tuku tolu liu ona mak sira rona de'it bee somu morru eskola ne'e monu tarutu.
"Bee sobu morru ne'e kala iha jam-tiga liu ona, no ami mós la toba, hadeer to'o loron de'it”, hatete José ba www.tempotimor.com iha Manleuana, segunda (05/04).
Nune’e, Domingas Rodriguês nu'udár estudante husi UNTL hamutuk ho nia alin mane ida ne'ebé aluga uma (kost) besik eskola EBF ne'e hatutan, bainhira akontese udan boot, nia sei estuda to'o tuku rua madrugada liu mak foin deskansa.
Info : ema hahu hamos foer no tahu iha Kost ne'ebe sobu husi inundasaun iha Domingo (4/4) besik mota Maloa, Dili, Segunda (5/4) Foto Tempo Timor
Maibé hafoin iha tuku 4:18 dadersan, hakfodak mai sira-nia kuartu laran nakonu ona ho bee hodi estraga totál sira-nia dokumentu eskola nian, hanesan kópia matéria sira ho leptop ida ne'ebé uza durante estudu, aat hotu.
"Ami hadeer iha tuku 4:18 ona, sasán uma-laran no eskola nian la salva, depois mota tun boot, sai ladi'ak, ami hakilar husu ajuda fali ba viziñu sira sorin mak hodi soe tama paralon mai ami kaer mak hodi sai husi ne'e”, dehan estudante ne'e ho triste.
Kona-ba morru eskola ne'ebé bee sobu, sira rasik la sente no lahatene, tanba sente trauma hodi okupa ho salva ida-idak nia-an, oinsá mak bele sai husi kost laran.
Tuir observasaun www.tempotimor.com iha terrenu nota katak, ho korente mota Maloa ne'ebé boot, rezulta bee tama to'o sala laran sira nakonu ho tahu, inklui kost ne'ebé estudante sira aluga, laran nakonu ho tahu, estraga mós fós ne'ebé sira uza hodi konsumu loroloron, aat hotu, nune'e mós iha kuartu ida mak besik atu tohar, inklui dapur bee lori halai tama to'o arredóre eskola bázika fillial Manleuana nian.(*)