Udan boot hahú husi loron domingu 03/04 to'o 04/04 maka mósu inundasaun boot iha kapitál Dili hodi tama komúnidade sira nia uma iha área Aitarak-laran, Suku Kampun-Alor, Postu-administrativu Don Aleixo Munisípiu Dili.
Tuir observasaun tempotimor iha terenu nota katak, komúnidade kuaze 600-resin dadaun okupa hela edifísiu Ministériu Finansas Aitarak-laran, parte lantai primeiru.
Fernando Fuca Abi nu'udár komúnidade ne'ebé hela iha aitarak-laran, senti tristi tebes ho udan boot hamosu inundasaun, to'o estragus hotu sira nia sasán bázika iha uma laran.
"Situasaun hanesan ohin loron, ami mós senti tristi ituan, tanba ami mós estudante, udan boot mota mós tun sasán sira mota lori hotu, ami mós araska, ne'ebé ami nia sasán sira hanesan tein ninian, bikan, sana fós mota lori hotu kedas", dehan nia bá tempotimor, iha edifísiu Ministériu Finansas Aitarak-laran, domingu (04/04).
Nia dehan, kalan ida agora temporariamente sira sei toba iha edifísiu Ministériu Finansas nian, tanba uma bee sei nakonu hela.
"Ohin sasán sira mota lori hotu, ne'ebé ami presiza hela iha ituan ne'e para boot sira haree oinsá ajuda ami, orsida kalan ami toba iha ne'e", dehan nia
Nune'e mós, komúnidade afeitadu Maria Rosalia K. B. Da Silva, senti tristi tebes ho situasaun inundasaun ne'e, tanba sira nia hahán, no ropa, mota lori hotu.
"Ami senti tristi loos, tanba ami nia fós foin dadauk governu fahe tiha mós banjir lori ba hotu, pois ami nia sasán iha uma laran la aproveita hotu kedas", nia espresa
Tan ne'e, komúnidade sira husu ba parte relevante sira atu fó apoiu urjenti.
"Husu boot sira atu ajuda tiha ami, tau matan netik mai ami, ami mós la hatene, ami nia oan sira agora atu han sáida, atu hatais sáida, ropa maromak nian atu hatais mós laiha, ropa bokon, banjir lori hotu, ami la hatene sasán sira ne'e bee lori ba ne'ebé", dehan nia
Komúnidade hirak ne'e, sei kontinua okupa Ministériu Finansas Aitarak-laran, hodi hein bee ne'ebé nakonu sira nia hela fatin tun hotu hafoin bele fila hikas.
Situasaun ne'e, Vise-Ministra Solidaridade Sosiál no Inkluzaun (MSSI), Signi Verdial, iha ona terenu hodi apoiu hahán bázika ho urjenti ba komúnidade hirak ne'e. (*)