"Ohin loron ita tenke buka dalan hodi identifika dezafiu boot sira ne’ebé média hasoru iha kontestu demokrátiku", dehan nia, iha salaun Katedral-Dili, Sesta (10/5).
Tuir nia, dezafiu ne’ebé bele sai hanesan risku ida ba demokrasia, la’ ós deit iha Timor-Leste maibé iha mundu tomak. Rede sosiál ne’ebé boot ba beibeik no hamosu fali fenómenu ida ne’ebé sai preokupasaun iha mundu tomak mak notísia ka lia falsu ne’ebé buras ba beibeik.
Lú Olo husu sosiedade hotu tenke moris hamutuk ho informasaun loos loron-loron. Tanba lia falsu sira bele hamonu valores no prinsípius ba demokrasia no liberdade. Tanba informasaun no lia loos mak bele liberta ema, tantu feto ka mane atu sai sidadaun responsável iha ida-idak nia Nasaun. Tanba ne'e aimoruk ne’ebé diak liu atu hasoru no halakon lia falsu, maka konxiénsia sidadaun ida-idak nian.
Prezidente mós husu governasaun ohin loron nian tenke bazeia ba prinsipíu inkluzaun polítika, sosiál no ekonómika, no média tenke sai ponte ida hodi promove diálogu, debate onestu no nakloke, transparente no responsável.
Lider nasional ne'e mós fiar jornalista sira sei kontribui hodi hasa’e konxiénsia sidadaun sira-nian iha tempu ida ne’ebé ita-nia demokrasia sei nurak hela.