Organizasaun ne’e hanesan kompromisu ida husi Jornalista Timoroan sira ne’ebé haknar-an ba servisu jornalismu ida ne’ebé transparente, responsável no kredível iha rai-laran, rejiaun no iha mundu.
Lia hirak ne'e hatoo husi Prezidente Repúblika, Francisco Guterres Lú Olo, bainhira ensera Dili Dialogu Forum, iha salaun Katedral-Dili, Sesta (10/5).
Xefe Estadu dehan, kondisaun fundamentál ida ba demokrasia mak iha liberdade espresaun no imprensa ida ne’ebé responsável no livre. Tanba ne'e ho ezisténsia KI hanesan kontribuisaun boot ba formasaun no informasaun responsável husi sidadaun sira.
Nia dehan Índise Global kona-ba Liberdade Imprensa husi tinan 2019 koloka ona Timor-Leste iha pozisaun di’ak ida iha kontestu Ázia. Tanba ne’e, importante teb-tebes katak jornalista sira tenke hatene uza nafatin liberdade imprensa ne’ebé garantidu ona ho responsabilidade, transparénsia no étika.