"Ita harii ita nia Estadu ho bua oioin hanesan rai, lei, konstituisaun, inu nasional, no seluk tan, maibé buat sira ne'e hotu presiza konsiénsia sosiál", tenik nia, bainhira prezide misa, iha Igreja Santu Antonio-Motael, Tersa (27/11).

Igreja Katólika iha parseiru di'ak ho governu atu haree ba buat sira ne'ebé importante iha nasaun ida ne'e mak verdade, justisa, amor, sira ne'e mak sei atinje konsiénsia sosiál.

Iha fatin hanesan, Prezidente Republika, Francisco Guterres Lú-Olo dehan, hamutuk iha Uma Kreda ne'e atu hasa'e orsaun ba Aman Maromak no hanoin fila-fali eroi sira neebe mate ba rai ne'e.

"Ita neebe sei moris nee, moris atu serve ba ita ema neebe hanesan nee hodi harii domin, paz, estabilidade, no justisa" tenik Xefe Estadu.

Misa agradesimentu ne'e realiza iha Igreja Motael, tanba Igreja ne'e mós sai fatin istóriku ba saudozu sira ne'ebé dedika mós sira-nia aan ba luta libertasaun nasional.

Partisipa iha misa agradesimentu ne'e mak PR Lú Olo ho nia Espoza, Xefe Estadu Maior F-FDTL, Major Jeneral Lere Anan Timur, Brigadeiro jeneral Falur Rate Laek, Prezidente Parlamentu Nasional Arão Noé de Jesus, inklui membru governu sira.