Tempo Timor - Kanal Notisia, Husi imi ba imi

Switch to desktop Register Login

Tempo Timor

Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

Website URL: http://www.tempotimor.com

Bishop Parabeniza AMP

Published in Politika

 Julie Bishop

DILI – Ministra Negósiu Estranjeiru Austrália, Julie Bishop hato’o parabéns ba povu Timor – Leste, liliu ba partidu koaligasaun Aliansa Mudansa ba Progresu (AMP) ne’ebé hetan votu maioria iha eleisaun antisipada foin lalais.

“Ha’u fó parabéns ba povu Timor – Leste ne’ebé hala’o ona eleisaun parlamentár ho susesu, no ba Aliansa Mudansa ba Progresu (AMP), lidera husi S.E. Xanana Gusmao, ne’ebé hetan votus maioria,” hatete Bishop liuhosi komunikadu imprensa ne’ebé Tempo Timor asesu.

Bishop hatutan, observadóres Austrália no internasionál konfirma ona katak eleisaun sira foin lalais ne’e hala’o ho dame no ordenadu. Timoroan barak mak partisipa hodi ezerse sira nia direitu ba vota.

“Ha’u mos fó parabéns ba autoridades eleisaun no seguransa nian kona-ba sira nia servisu ba iha eleisaun”.

Austrália mak Timor – Leste nia parseiru dezenvolvimentu no seguransa ne’ebé boot-liu. Hanesan viziñu ne’ebé besik – malu.

“Ita sempre fahe interese ba malu no hametin ligasaun ema-ba-ema. Ami sei servisu hamutuk ho governu foun atu lori ba oin ita nia tratadu istóriku kona-ba estabelesimentu fronteira maritima permanente ne’ebé foin lalais ita asina”.

“Ami hein hela tomadepose Primeiru-Ministru no Gabinete foun, tamba Governu Austrália komprometidu nafatin ba kooperasaun ne’ebé metin-liu entre ita nia nasaun”.

Entretantu, Tribunal Rekursu proklama ona rezultadu eleisaun antisipada katak partidu koaligasaun Aliansa Mudansa ba Progresu (AMP) mak sai nu’udar partidu manan nain iha eleisaun ne’e ho total votu 309.663 (49,6%) fahe ba kadeira hamutuk 34.

Entretantu, partidu manan daruak mak partidu FRETILIN ho total votu 213.324 (34,2%) fahe ba kadeira 23 de’it. Tuir fali Partidu Demokraátiku (PD) ho total votu 50.370 (8,1%) fahe ba kadeira 5, partidu koaligasaun Frente Dezenvolvimentu Demokrátiku (FDD) hetan votu hamutuk 34.301 (5,5%) fahe ba kadeira 3. (Oki)

Comment

 

DILI - Fundador empreza ENSUL Engenharia Timor - Leste, António Simões Marques Couto hatete, Dili Financial Business Center (DFBC) ka Centro de Negócios e Finanças de Díli nunka paradu, tanba konsege investe ona no harii obra eselénsia ida iha nasaun ne’ebé sai nu’udar orgullu ba ema hotu.

Coutu mós Konsul Honorário Repúblika Demokrátika Timor-Leste ba Porto, Portugal hatutan liu hosi nota eskrita ba Tempo Timor katak, projetu ida ho ambisaun hanesan propoin ona, nunka hala’o iha Timor no tanba ho motivu ida - ne’e eziste dezafiu boot ne’ebé sei hakat liu, hanesan mós hakat liu hirak ne’ebé iha pasadu, nu’udr ezemplu, dezeñu projetu hotu ne’ebé tenke halo melloria no adaptasaun hodi inklui aumentu iha estasionamentu (problema ida ne’ebé la eziste iha tinan 10 iha Dili), respeita padraun a’as liu kona - bá ambiente, seguransa no enerjia hodi ajusta karaterístika sidade Dili nian rasik.

“Iha projetu, DFBC, mak naran hosi projetu ida-ne’e nian iha ámbitu akordu espesiál investimentu nian ne’ebé asina ho Estadu Timor - Leste, grupu empreza ida ne’e, nunka paradu, pelu kontráriu, investe ona no harii eselénsia ida iha nasaun ne’ebé sai nu’udar orgullu ba ema hotu,” hatete Couto via esplikasaun eskrita ba Tempo Timor iha Dili, Kuarta (30/05).

Couto hatutan, iha konstrusaun faze dahuluk nian, hahu ona iha tempu kleur liubá, hakat liu ona obstáklu sira hanesan falta ekipamentu iha rai laran ba tipu fundasaun projetada (solusaun dahuluk - “estaka moldada”,  solusaun daruak- “estaka kravada” no solusaun dahikus ne’ebé adota mak - “Floresta mikro - estaka”), inezisténsia grua sira ho kapasidade, ka kofrajen espesífika. Ekipamentu hirak-ne’e hotu hola, no agora halo parte hosi solusaun ne’ebé aselera hela velosidade konstrusaun edifísiu dahuluk ne’ebé bolu Business One, iha ne’ebé sei fornese ba kliente sira ne’ebé buka edifísiu ne’ebé ho padraun no kualidade a’as tebes.

Historikamente, iha tinan 2009 ENSUL Engenharia, S.A. hetan aporvasaun hosi governu liuhosi reuniaun Konsellu Ministru sira kona - bá arendamentu rai ho nia luan 22.635,00m2 iha kedas sidade Dili nia fuan laran, no tama ba tinan 2013 kuartu governu konstitusional ne’ebé lidera hosi primeiru - ministru, Kay Rala Xanana Gusmão halo lansamentu fatuk dahuluk (primeira pedra) ba rai ne’e, tanba ENSUL promete ba governu Timor - Leste katak sei halo investimentu ba rai ne’e ho valor osan hamutuk US $ millaun 18, maibé to’o oras ne’e foin mak hahu hari ai - rin sira.

Couto esplika, obra konstrusaun Business One ne’e, ho estimasaun US $ millaun 24, iha nia totalidade ho prazu ezekusaun nian fulan 36, no to’o iha momentu ida-ne’e halo ona gastu besik US $ millaun 5, ho projetu no estudu enkuadramentu no dezenvolvimentu, projetu espesialidade, projetu fundasaun, estaleira obra, dezaterru transporte vazadouru, preparasaun terrenu, implantasaun edifísiu no seluk tan.

Entretantu, antes ne’e kompañia nasionál sanulu (10) desidi ona hodi suspende pagamentu arendamentu rai ba kompañia internasional ENSUL Engenharia, S.A., tanba deskonfia mosu “irregulariedade” balun iha prosesu arendamentu rai ne’e rasik.

“Ida ne’e mak problema. Sira la investe ida. Sira aluga fali ba ita Timoroan sira ho valor a’as tebes. Tanba sira laiha baze legal ruma, ami deseidi hodi suspende tiha pagamentu ne’e, no hein esklaresementu hosi ENSUL,” hatete nain ba empreza Timoroan ida ne’ebé mós aluga tutan rai ne’e hosi Central Sociedade Comercial, S.A (CSC, S.A) ba Temo Timor iha Dili foin lalais.

“Atu rehabilita ka pinta de’it ruko oan sira ne’ebé mak oras ne’e eziste hela desde Portugues nia tempu, kompañia Timoroan barak mós prontu ona hodi halo. Ida ne’e la persija empreza internasional,” esplika emprezariu Timoroan ida ne’ebé sujere ba governu foun persija halo revizaun ba kontratu arendamentu rai ho empreza ENSUL Engenharia, S.A iha tinan hirak ba kotuk.    

Maibé, Couto rejeita total liafuan baraka, tanba tuir nia katak nia investe, la’ós halo barak.  

Empezariu Timoroan ne’e hatutan, lei propriedade katak subarendamentu nia valor labele a’as liu arendamentu ho governu, maibé realidade hatudu katak investidor nasionál sira ka kompañia nasionál sira durante tinan barak ona selu arendamentu rai ne’e ba empreza CFT S.A ho valor osan ki’ik liu mak US $ 1200 to’o boot liu mak US $ 6700.

“Situasaun ne’e la kria kondisaun seguru ba kompañia nasionál sira hodi kontribui ba dezenvolvimentu ekonómia iha rai laran,” nia esplika.

Iha parte seluk, eis Ministru Ekonómia no Dezenvolvimentu, João Mende Goncalves rekoñese katak nia mak asina duni akordu investimentu ba empreza ENSUL nian, maibé hafoin iha tempu ne’eba to’o oras ne’e nia la’ós ona nu’udar membru governu hodi tau matan kona - bá investimentu ne’e rasik.

“Se ha’u mak nu’udar membru governu nafatin ha’u sei halo avaliasaun ida ba prosesu investimentu ne’e rasik depois mak bele foti desijaun atu hapara ka la’e, maibé durante ha’u nia tempu ha’u hapara ona projetu ida iha Com, munisipiu Lautem, tanba empreza ne’e la kumpri saida mak nia asina ho governu,” hatete eis ministru João Goncalves ba Tempo Timor iha nia serbisu fatin, Landa Mark, Fatuhada - Dili, Kinta (24/05). 

Nia hatutan, desijaun atu halo arendamentu ba rai ne’e desidi iha reuniaun Konsellu Ministru sira iha mandatu kuartu governu konstitusional nian. (Oki)

Comment

Testamuña Xanana Mak Autoriza Kareta ba Pe. Martinho

Published in Justisa
Testamuña Kay Rala Xanana Gusmão 

DILI – Prosesu julgamentu ba kazu krime pekulatu, administrasaun danoza no fasifikasaun dokumentu ne’ebé deskonfia involve eis Ministru Obras Públiku Transporte no Komunikasaun (MOPTK), Gastão de Sousa no Padre Martinho Gusmão seidauk remata, no testamuña Kay Rala Xanana Gusmão deklara ba Tribunal katak nia mak autoriza duni kareta ne’e, maibé la’ós pekulatu. 

Kazu krime ne’e mós involve Jordão Madeira de Jesus da Silva Sousa nu’udar oan mane hosi arguidu Gastão Sousa, no funsionariu MOPTK, Diogo da Costa.

Iha prosesu julgamentu dahuluk, arguidu Gastão deklara ba Tribunal katak, nia hetan autorizasaun hosi primeiru – ministru Kay Rala Xanana Gusmão iha tempu ne’eba, no arguidu ezekuta de’it autorizasaun ne’e hodi fó kareta ida ba Padre Martinho Gusmão atu uja ba festa tinan 200 Santo António iha parokia Manatuto. Kareta ne’e nu’udar kareta doasaun hosi Banku Dezenvolvimentu Aziatiku ka BDA (Asian Development Bank).

“Ha’u mak fó orden ba ministru ministru Gastão hodi fasilita kareta ida ba padre Martinho, tanba momentu ne’eba ami susar tebes atu buka kareta,” hatete testamuña Xanana iha Tribunal Distrital Dili (TDD), Tersa (29/05).

Testamuña Xanana mós konsidera kazu ne’e la’ós nu’udar pekulatu, tanba ema sira ne’e nu’udar funsionáriu públiku uja kareta Estadu hodi hala’o serbisu públiku. 

Antes ne’e, arguidu Gastão mós deklara ba Tribunal katak, kareta ne’ebé ba nia a’an de’it no fó ba nia oan sira ne’e la loos, tanba tuir nia katak nu’udar ministru iha tempu ne’eba iha direitu atu uja kareta rua. Kareta ida ba operasional no ida seluk ba kareta ofisial. Kareta ofisial mak normalmente para iha uma, maibé kareta operasional bainhira persija mak ba foti iha nia serbisu fatin.

Nune’e, aain ba asaun penal (Ministériu Públiku) akuza no rekere julgamentu iha prosesu komun tuir lei Kódigu Penal iha artigu 236, númeru 2 ho númeru 48 iha alinea d kontra arguidu sira hanesan Gastão de Sousa nu’udar MOPTK, Jordão Maria de Jesus da Silva Sousa koñesidu ho naran Jordy Sousa nu’udar arguidu Gastão Sousa nia oan mane, Ferlio Afonso Bado Loi da Silva Sousa koñesidu ho naran Viali nu’udar funsionáriu públiku iha Ministériu Negósiu Estranjeiru no Kooperasaun (MNEK), no Padre Martinho Gusmão.

Akuzasaun Ministériu Públiku nian katak, iha loron 28 Fevereiru 2010 governu Timor – Leste asina akordu ho BDA ba projetu finansiamentu ho valor US $ 46.000.000 ne’ebé atribui ba fundu rehabilitasaun no konstrusaun estrada. Projetu ne’e remata ona iha tinan 2012 no tenke entrega hikas osan restu sira ne’ebé la uja ho valor US $ 82.776,77 inklui kareta 8.

Hosi kareta hirak ne’e MOPTK simu kareta ho númeru matrikula 18-948 TLS marka Toyota Land Cruiser no kareta ida seluk ho númeru matrikula 18-723 TLS marka Toyota RAV4 inklui kareta Toyota Land Cruiser Prado ho númeru matrikula 18-947 TLS. Hafoin simu kareta hirak ne’e, instrusaun verbal hosi arguidu Gastão la fó koñesementu ba departementu lojistika MOPTK.

Akuzasaun ne’e mós hatutan katak, bazeia ba planu ne’ebé sira halo ona mak iha loron 24 Setembru 2012, arguidu Gastão komunika ba BDA kona – bá nia desijaun hodi fó kareta rua ho númeru matrikula 18-948TLS no 19-754TLS ba unidade jestaun projetu, inklui manutensaun no abastesimentu kombustivel ne’ebé finansia hosi BDA. Maibé, realidade hatudu katak kareta ho númeru matrikula 18 – 948TLS rai hela iha arguidu Gastão Sousa nia rezidensia iha aldeia Bekusi kraik, suku Bekora – Dili. Arguidu Gastão mós permite arguidu nain rua Jordy no Viali hodi uja kareta hirak ne’e ho titlu pessoal durante sira nia paseiu iha Dili laran.

Tama fali entre fulan Abril ka Maio 2014, aguidu Martinho Gusmão solisita verbalmente ba arguidu Gastão hodi husu ajuda kareta ida ba preparasaun seremónia komemorasaun tinan 200 parókia Manatuto nian, no iha loron 13 Maio 2014 arguidu Gastão entrega pessoalmente kareta ho númeru matrikula 19 – 754TLS ne’ebé uja hela ba titlu privadu hosi arguidu Diogo da Costa.

Entretantu, arguidu Martinho uja kareta ne’e durante tinan ida, fulan 3 nia laran, no konsege husu dala rua ba arguidu Gastão hodi halo manutensaun ba kareta ne’e iha loron 14 Juñu 2014 no loron 28 Agostu 2014 uja osan restu hosi BDA hamutuk US $ 532,34.

Tuir akuzasaun hirak ne’e, konsidera katak bens no ekipamentu hirak ne’ebé sira uja partense ba Estadu. Maske nune’e, sira aproveita patrimóniu públiku ba benefisiu propriu, mezmu sira hatene katak aktu sira ne’e prezudika Estadu.

Ho ida ne’e mak arguidu Gastão hetan akuzasaun dahuluk hosi Ministériu Públiku ho krime pekulatu kontra artigu 295 númeru 1 to’o 3 ba autoria material ho arguidu Diogo Silva. Daruak, krime pekulatu ida seluk mak kontra artigu 295 númeru 1, 41 no 34 ba autoria material ho arguidu Jordy Sousa ho arguidu Viali. Datoluk, mak krime administrasaun danoza kontra artigu 274 númeru 2 to’o 3 ba komplesidade ho arguidu Martinho Gusmão.

Ministériu Públiku mós akuza arguidu Diogo da Costa ho krime pekulatu iha artigu 295 númeru 1 to’o 3 ba autoria material ho arguidu Gastão. Krime daruak nian nafatin iha krime pekulatu iha artigu 295 no 41, no krime ida ikus nian mak kona – bá krime falsifikasaun dokumentu kontra artigu 303 númeru 1, alinea A no 41.

Entretantu, arguidu Jordy Sousa ho arguidu Viali mós hetan akuzasaun ho krime pekulatu iha artigu 295 no 1, 41, no 34 ba ko – autoria material ho arguidu Gastão.

Arguidu Martinho Gusmão hetan akuzasaun ho krime administrasaun danoza kontra artigu 274 no 2 ho 3 ba kumplisidade ho arguidu Gastão.

Prosesu ba kazu ne’e sei kontinua iha loron Tersa, 26 Juñu 2018 hodi halo akariasaun entre arguidu Diogo ho testamuña.

Audensia julgamentu ne’e dirije hosi koletivu mak hanesan juiza prezidente Albertina Neves, António do Carmo no juiza Zumiaty Freitas. Ministériu Públiku reprezenta hosi prokurador Jacinto Babo Soares no prokuradora Lidia Soares. Arguidu sira hetan asistensia legal hosi defensor Cancio Ximenes, Fernando Carvalho no Estaqui Guterres. (Oki) 

Comment

@2018 - Tempo Timor. Developed by Kalohan.net

Top Desktop version